15/1/2012 睩睩 4yr 2m 4d, 卜卜 3yr!

今日係卜卜三歲生日啊! 咁快就三歲, 都唔明o的時間點解過得咁快!

"今日三歲, 唔知daddy媽咪點同我慶祝呢??"

就係同家姐玩踩腳慶祝??

11/1/2012 睩睩 4yr 2m, 卜卜 2yr 11m 27d

一月, 係每年最忙碌o既月份, 生日源源不絶! 順序有姑媽, 婆婆, 卜卜, daddy 同埋爺爺, 月頭忙到月尾! 剛剛慶祝過o既有姑媽同婆婆o既生日. 姑媽生日我哋一齊去咗食自助餐. 食就幾好食, 不過我哋兩家都要照顧住兩隻怪獸, 其實都無嗒好食. 睩卜又好鍾意食蟹, 但呢度啲蟹唔係大大隻蟹腳嗰種, 真係拆蟹肉都拆到手軟!

卜卜喺度嚇緊坐喺佢對面o既亮亮表弟, 表弟梗係唔驚啦! 只有大人會俾佢想要o既反應佢之嘛!

睩睩卜卜摶晒命食平時唔俾食o既嘢, 喪食雪糕同埋朱古力棉花糖! 睇吓食到幾醜怪! 不過越核突佢兩個就越開心, 好彩無整污糟啲衫!

卜卜話啲生果好好味啊!...  食完後, 睩睩又話要去姑媽到玩, 不過佢今次講明, 只去玩, 唔去瞓!

9/1/2012 睩睩 4yr 1m 29d, 卜卜 2yr 11m 25d

卜卜平時多數係兩隻眼都單眼皮或者一單一雙大細眼嘅，早兩日無端端兩隻眼都雙眼皮，好少可咁靚仔，於是叫佢俾媽咪影相，佢最初扭扭擰擰懶怕醜咁，後來俾我哋講得兩講鬼死咁飄飄然，眼仔碌嚟碌去咁俾我哋影！

我哋估卜卜真係以為自己好靚仔啊！

2/1/2012  睩睩 4yr 1m 22d, 卜卜 2yr 11m 18d

2012新年快樂！睩卜嘅新年慶祝活動就係參加熊熊嘅表演

真係好鬼鍾意佢哋攬頭攬頸個樣，表演前攬攬打氣

表演場地入面竟然有小塊草地，啲小朋友個個喺度喪跑，表演前輕鬆吓先

27/12/2011 睩睩 4yr 1m 16d, 卜卜 2yr 11m 12d

今年嘅聖誕都過得好充實啊，23﹣26日連續四日都有活動，到咗今日真係成個散晒

聖誕第一擊, 會所搞o既聖誕party

聖誕卜卜

聖誕睩睩同睩睩o既best friend 馴鹿承哲都一齊去玩. 卜卜點解無一齊影相呢? 因為卜卜驚個聖誕老人呀, 上次萬聖節卜卜俾一個uncle扮o既鬼嚇到魂飛魄散之後, 就驚o左所有呢o的扮鬼扮馬o既o野喇.

21/12/2011 睩睩 4yr 1m 10d, 卜卜 2yr 11m 6d

卜卜學校有聖誕表演，一班小朋友真係可愛到爆燈！佢哋總共唱咗三首歌，以下係其中一首

19/12/2011 睩睩 4yr 1m 8d, 卜卜 2yr 11m 4d

三次o既小機場大學問活動終於完成! 睩睩扮齊空中小小姐, 小飛機司及機場小特警. 課堂內容包括:

1. 教授專業知識 (介紹工作的性質及要求)
2. 測試及訓練 (利用各種遊戲測試或訓練學員)
3. 模擬實習 (簡單的模擬訓練考驗學員)
4. 執行任務

第一次去就係做空中小小姐. 睩睩著得lady o的都幾靚喎!

17/12/2011 睩睩 4yr 1m 6d, 卜卜 2yr 11m 2d

尋晚, 睩睩o係佢最好o既朋友屋企食完晚飯返o黎, 臨目訓前細佬唔知點樣專登踩佢o的頭髮, 搞到睩睩好痛, 不停話"我唔要你喇, 我唔要細佬喇..." "我去xx(佢o既好朋友)到住算喇..." 細佬都唔執輸, 又話"我唔要家姐喇...." "我唔同家姐做好朋友喇..."; 呢類情況其實每一日都會發生, 通常都己懶得理佢o地, 因為轉過頭, 佢o地又會攬頭攬頸... 

唔爭o野o既時候好friend o架!... 有時我會提醒佢o地, 無得揀o架喇, 睩睩永遠都只會有呢個細佬, 卜卜亦永遠只會有呢個家姐, 咁梗係friend o的好啦!

11/12/2011 睩睩 4yr 1m, 卜卜 2yr 10m 26d

卜卜返新嘅PN，家姐就照舊返CPSKG，不過升班喇，變咗K2姐姐喇！開學例必要做嘅就係影學生相, 為咗慳錢同埋可以影到滿意為止，我哋一向都係喺屋企影嘅

呢張梗係唔得啦

10/12/2011 睩睩 4yr 29d, 卜卜2yr 10m 25d

今年二月，卜卜足兩歲時以超超細仔身份插班PIPS 嘅PN，讀咗五個幾月，到八月尾先再正式開始讀PN

著起套校服，都幾醒目吖！

學之園係媽咪嘅首選，不過其實係waiting入㗎咋。面試時卜卜表現其實都OK，不過個別IN時卜卜俾放喺隔離嘅廚房玩具吸引咗過去（卜卜好鍾意玩廚房玩具，去親interview等候時都係玩呢樣嘢），係都要去玩唔肯坐低IN，媽咪同老師都花咗唔少唇舌先叫到佢坐低，佢基本上係好快就答晒啲問題，因為老師答應佢IN完就可以去玩一陣，所以佢答得好快，快到有啲敷衍咁 。group in 聽英文故事時好乖坐定定，但係逐個出去開顏色盒時就怕醜唔係好肯出去，不過到佢出咗去成功答完時佢報以一個十分可愛嘅笑容，啲老師都笑埋一份，可能咁攞返少少分。