December 2008 (一卜一睩)

行得叻叻之後嘅廸豬湖三輪車遊

一卜一睩 | 23rd Dec 2008 | 一般 | (97 Reads)

22/12/2008 1 year 1 month and 11 days

尋日, 天氣清涼, 陽光普照, 最適宜郊遊, 首選梗係廸豬湖啦! 睩睩宜家行得好叻, 去公園玩好玩好多, 仲有睩睩嘅新三輪車車一齊玩.

紅卜卜嘅snoopy 三輪車, 幾sharp! 襯埋飄逸嘅睩睩, 好型呀!

媽咪見睩睩咁靚, 黐埋去影番張相先!

但係睩睩坐得一陣又唔鍾意坐車車, 要自己推... 推呀推呀...

哎吔! 反車... 人都反埋...

daddy 襯睩睩反車, 搶咗睩睩架車車, 睇吓daddy 個樣幾鬼祟!

媽咪覺得呢幅相同睩睩好似樣

"睩睩, 望鏡頭呀!" "媽咪, 你又望鏡頭喎!"

影子度高法... 睩睩最矮!

麻鷹捉鷄仔

"wea!... daddy唔俾百力支我食呀!... woo... woo...", daddy個樣好得戚...

終於搶到手, 睇吓先...

無!

乖乖睩睩識掉垃圾!

無百力支唔緊要啦, 媽咪俾蝦條食

食完蝦條飲水水, 飲到成隻老鼠咁.

留言(2) | 引用(0)

Christmas Party at Tutor Time

一卜一睩 | 21st Dec 2008 | 一般 | (85 Reads)

20/12/2008 1 year 1 month and 9 days

呢日睩睩喺佢番playgroup嗰度去咗佢嘅第一個聖誕party. 婆婆送咗條紅卜卜靚靚裙仔俾睩睩, 襯晒聖誕! 嗰度有好多遊戲玩, 我哋仲同聖誕老人影相, 不過張相就遲啲先有得攞...

睩睩首先去幫聖誕樹扮靚靚...

點知變咗幫自己扮聖誕樹!

呢個遊戲係ride the sleigh, 辛苦daddy扮聖誕鹿拉睩睩喇! 睩睩個樣幾歎!

倒轉拉都得!

媽咪同睩睩一齊用棉花糖, m&m朱古力同百力支整一個食得嘅雪人...

登登登櫈... 棉花糖雪人!

睩睩話食咗佢隻手先, 等佢無得反抗...

細細個睩睩玩攀石... 媽咪見佢咁辛苦諗住幫吓佢啦, 點知...

換嚟睩睩嘅"篾"嘴一個!...唔通話我睇小佢?

同daddy一齊玩搖鴨鴨

睩睩咁聚精會神地整緊乜呢?...

聖誕老人! 幾靚!

大大隻daddy鞋保護住細細隻睩睩鞋

留言(0) | 引用(0)

睩睩刷牙仔

一卜一睩 | 17th Dec 2008 | 一般 | (96 Reads)

17/12/2008 1 year 1 months and 6 days

近排買咗支牙刷仔俾睩睩代替牙膠, 仲買咗bb牙膏, 即係吞得落肚嘅牙膏, 唔知係咪啲牙膏好味, 睩睩愛上咗刷牙, 之前刷親都喊到七彩, 宜家攞走佢支牙刷就喊喊喊.

留言(1) | 引用(0)

第一次面試

一卜一睩 | 6th Dec 2008 | 一般 | (100 Reads)

6/12/2008 one year and 25 days

呢日睩睩去咗佢呢世人嘅第一次面試. 地點係九龍塘樂基幼兒學校, 見出年開學嘅nursery.

喺網上download報名表嗰陣已經知道好多人報名, 後來報紙仲報導有人出錢買報名表添, 已經估到一定好多人爭... 果然去到學校附近, 離遠已經見到好多人喺門口排晒隊, 學校入面更加迫滿人... 排隊等咗一輪, 終於到我哋見喇... 個老師首先問我同daddy幾條關於睩睩日常生活嘅問題, 趁機俾睩睩warm up 一下, 之後就問睩睩... 一問就問, 你叫咩名呀?... 吓?! 睩睩十三個月都未夠, 點講自己個名呀? 佢都係啱啱先識當我哋問佢邊個係睩睩時, 拍拍自己心口咋喎... 不過一早都估到會有啲困難, 因為睩睩年尾出世, 屬於細女, 連學校都係話叫佢即管試吓in咋. 睩睩當然答唔到, 仲貫徹佢一向見到陌生人嘅作風, 就係眼定定咁望住老師, 望咗好耐, 好似喺度諗緊呢個係乜水... 之後老師俾兩幅圖畫睩睩睇, 分別係青蛙同貓, 然後問邊幅係青蛙呀?... 吓, 我都無教過佢乜嘢係青蛙... 睩睩左望右望兩幅畫, 然後一指指住隻青蛙, 吓! 咁勁? 擺明撞彩啦! 之後再俾狗同金魚佢揀邊隻係狗, 佢望兩望指咗條金魚, 我同daddy不約而同哋雙手合埋喺度扮魚游水, "呢條魚魚嚟o架...", 哎吔, 暴露咗我哋啲低能嘢添!... 之後再從蘋果同橙之中揀個蘋果, 今次又撞啱... 其實我估睩睩唔係真係識, 不過佢隻眼碌嚟碌去, 好似好認真地諗個樣真係好得意, 好好笑. 之後又問吓佢眼耳口鼻喺邊, 呢啲睩睩平時識o架, 不過佢一向都好怕陌生人, 好慢熱, 所以都係無反應, 淨係眼定定咁望住老師... 於是我哋問睩睩, 爸爸眼眼呢, 點知睩睩好粗魯哋一篤篤去daddy隻眼到, 連眼鏡都甩咁滯, 好好笑!... 到最後, 老師送份玩具紀念品俾佢, "送份禮物俾你好唔好呀?"... 之前嘅blog都提過, 問親睩睩好唔好, 係唔係, 佢想 say yes嘅話都會係咁擰頭, 結果佢就係喺度擰晒頭, 老師好温柔地說:"送俾你o架!", 佢一手攞住份玩具, 個頭就係咁擰, 都唔知俾佢激死定笑死!

咁就in完喇! 見到咁人頭湧湧嘅場面, 我更意識到呢個年代嘅小朋友嘅競爭真係好大... 好鍾意陳奕迅首"大個女"嘅歌詞:

時光會迫你這副萬金之軀. 競逐世上各樣乜乜之最. 你若決定要做最尾一名絕對允許...

最重要心記得要開來競技角力賽最終不管輸贏都一般可愛

好似今次interview, 得當然開心, 就算唔得都無乜所謂, 總算係第一次我哋三個一齊完成一件事, 又係一次幾得意, 好玩, 開心嘅經驗! 而且喺daddy媽咪心目中, 睩睩嘅表現已經係100分!